၂၀၁၅ ရွေးကောက်ပွဲကို လေ့လာ ဖို့ သမ္မတဟောင်း ဂျင်မီကာတာ ကို ကော်မရှင် ဖိတ်ကြားမည်
ဇူလိုင်လ ၂ ရက်နေ့
ဒီကနေ့ နေပြည်တော် ပြည်ထောင်စုရွေးကောက် ပွဲ ကော်မရှင်ရုံးမှာ ကော်မရှင် ဥက္ကဌနဲ့ နိုင်ငံရေး ပါတီတွေ တွေ့ဆုံပွဲအပြီး ကျင်းပတဲ့ သတင်းစာ ရှင်းလင်းပွဲမှာ ကော်မရှင် ဥက္ကဌ ဦးတင်အေးက ပြောခဲ့တာဖြစ်ပါတယ်။
"သမ္မတကြီး ဂျင်မီကာတာဆိုလို့ရှိရင် သူ့ဆိုရင် Long Term Observer ပေါ့၊ နစ်လ သုံးလလာပြီးတော့ ဘယ်လိုစည်းရုံးကြတယ်၊ ဘယ်လိုလုပ်နေတယ်ဆိုတာ လေ့ လာချင်ပါတယ်လို့ သူတို့ပြောထားတာ၊ ဒါကတော့ ကျနော့်အနေနဲ့ကတော့ အစိုးရခွင့်ပြုချက်ရရင်လာပါ၊ သို့သော် လည်းပဲ လေ့လာစောင့်ကြည့်သူအနေနဲ့ ရွေးကောက်ပွဲကာလာမှာတော့ လုပ်လို့ရပါတယ်၊ ကျနော်ကလည်းပဲ လွတ်လပ်တရားမျှတတယ်ဆိုတာ စောင့်ကြည့်လေ့လာခွင့်ရှိအောင် မှတ်ကျောက်တင်ပြီး ဆောင်ရွက်သွားချင် ပါတယ်၊ ကျနော်ဖိတ်ခေါ်ပါ့မယ်လို့ပြောထားတယ်၊ ဖိတ်ခေါ်တာလည်း ကျနော်ခေါ်တာမဟုတ်ဘူး၊ ခွင့်ပြုထားတာ အစိုးရခွင့်ပြုတာ"
ဒီနေ့တွေ့ဆုံပွဲမှာ လာမယ့်ရွေးကောက်ပွဲတွေမှာ နိုင်ငံရေးပါတီတွေ လိုက်နာရမယ့် စည်းမျဉ်းစည်းကမ်းတွေနဲ့ လွှတ်တော်ကိုယ်စားလှယ်လောင်း မှတ်ပုံတင်ကြေး သတ်မှတ်ချက်တွေကို ရှင်းပြတာလို့ သိရပါတယ်။
ဒါ့အပြင် လာမယ့်ရွေးကောက်ပွဲတွေမှာ ပီအာခေါ် အချိုးကျကိုယ်စားပြုစနစ် ကျင့်သုံး၊ မသုံးဆိုတာ လွှတ်တော်ရဲ့အဆုံးအဖြတ်ပေါ်မှာသာ မူတည်တယ်လို့လည်း ပြည်ထောင်စု ရွေးကောက်ပွဲကော်မရှင် ဥက္ကဌ ဦးတင်အေးက ပြောပါတယ်။
ပြည်ထောင်စုရွေးကောက်ပွဲကော်မရှင် ဥက္ကဌနဲ့ နိုင်ငံရေးပါတီတွေ တွေ့ဆုံပွဲကို နိုင်ငံရေးပါတီ ၆၅ ပါတီထဲ က ၆၁ ပါတီက ကိုယ်စားလှယ်တွေနဲ့ တစ်သီးပုဂ္ဂလကိုယ်စားလှယ်တွေ တက်ရောက်ခဲ့ပါတယ်။
ဒီအကြောင်း RFA သတင်းထောက် ကိုကျော်သူ တင်ပြထားတာကိုလည်း နားဆင်နိုင်ပါတယ်။
0 comments:
Post a Comment