၄၃၆ ပြင်ဆင်ရေး တပ်မတော်သားတွေပါဝင်ဘို့ ကိုကိုကြီးတိုက်တွန်း
ဂျွန်လ ၁၅ ရက်။

၂၀၀၈ ဖွဲ့စည်းပုံ အခြေခံဥပဒေ ပြင်ဆင်ရေးမှာ တပ်မတော်သား လွှတ်တော်ကိုယ်စားလှယ်တွေပါ ပူးပေါင်းပါဝင်ကြဖို့ ၈၈ မျိုးဆက် ငြိမ်းချမ်းရေးနဲ့ ပွင့်လင်းလူ့အဖွဲ့အစည်းခေါင်းဆောင် ကိုကိုကြီးက ဒီနေ့ တိုက်တွန်းပြောဆိုလိုက်ပါတယ်။

မြစ်ကြီးနားမြို့မှာရှိတဲ့ City Park Royal စားသောက်ဆိုင်မှာ အမျိုးသားဒီမိုကရေစီအဖွဲ့ချုပ် နဲ့ ၈၈ မျိုးဆက် ငြိမ်းချမ်းရေးနဲ့ ပွင့်လင်းလူ့အဖွဲ့အစည်းတို့ ပူးပေါင်းကျင်းပတဲ့ ပုဒ်မ ၄၃၆ ပြင်ဆင်ရေး ဟောပြောပွဲမှာ ကိုကိုကြီးက အခုလို တိုက်တွန်းခဲ့တာပါ။


"တပ်မတော်သားတွေဟာ ကျနော်တို့ပြည်သူတွေနဲ့ တသားတည်း ဖြစ်ချင်တယ်ဆိုရင် တပ်မတော်ကိုပါ အထင်အမြင်လွဲစေမယ့် တပ်မတော်ကို သွေးကွဲစေတဲ့ ဒီပုဒ်မကို ပြင်ဆင်ရေးမှာ တပ်မတော်သား ကိုယ်စားလှယ်တွေပါ ပူးပေါင်းပါဝင်ဖို့ ကျနော်တို့က ဖိတ်ခေါ်တယ်၊ ကျနော်တို့က ဘယ်သူမပါရဘူး၊ ဘယ်သူချန်ထား ဘယ်တုန်းကမှ မလုပ်ဘူး၊ နိုင်ငံသစ်တည်ဆောက်တဲ့နေရာမှာ တစ်ဦးတစ်ယောက်၊ တစ်စုတစ်ဖွဲ့ ချန်ထားတာလည်း မကောင်းဘူး၊ ကျနော်တို့က အားလုံးတစ်စုတစ်ဝေးတည်း တကယ့်ကို အမျိုးသား ပြန်လည်သင့်မြတ်ရေးစိတ်ဓါတ်နဲ့ ဆောင်ရွက်ချင်တယ်၊ ပူးပေါင်းပြီးတော့ ပြင်ဆင်ချင်တယ်၊ အဲဒါကျနော်တို့ရဲ့ ဆန္ဒ"

ဒီနေ့ ဟောပြောပွဲမှာ ကိုကိုကြီးအပြင် အမျိုးသားဒီမိုကရေစီအဖွဲ့ချုပ်က ပြည်သူ့လွှတ်တော် ကိုယ်စားလှယ် ဒေါက်တာဇော်မြင့်မောင်၊ ကချင်ပြည်နယ် အမျိုးသားဒီမိုကရေစီအဖွဲ့ချုပ် ဥက္ကဌ ဦးမြတ်သိန်းတို့ကလည်း ပုဒ်မ ၄၃၆ ပြင်ဆင်ရေး ဘာကြောင့်အရေးကြီးတယ်ဆိုတာကို အဓိကထားဟောပြောခဲ့ကြပါတယ်။

မြစ်ကြီးနားမြို့ ဟောပြောပွဲအတွက် မြို့နယ်အုပ်ချုပ်ရေးမှူးရုံးက ခွင့်ပြုချက်မပေးပဲ ကျင်းပခဲ့တာဖြစ်ပြီး ဒေသခံလူဦးရေ ၅၀၀ ကျော် တက်ရောက်ခဲ့ပါတယ်။ ဒီနေ့မှာပဲ ၂၀၀၈ ဖွဲ့စည်းပုံ ပြင်ဆင်ရေး လူထုဟောပြောပွဲတွေကို မော်လမြိုင်နဲ့ ကော့သောင်းမြို့တွေမှာလည်း ကျင်းပခဲ့ပါတယ်။

RFA Burmese